ਦਿੱਲੀ ਧਮਾਕੇ ਦੀ ਜਾਂਚ ’ਚ ਵੱਡੀ ਤਰੱਕੀ, ਫ਼ਰੀਦਾਬਾਦ ਤੋਂ ਲਾਲ ਈਕੋਸਪੋਰਟ ਕਾਰ ਬਰਾਮਦ

ਨਵੀਂ ਦਿੱਲੀ, 12 ਨਵੰਬਰ (ਜਪਅਨੰਤਪ੍ਰੀਤ ਸਿੰਘ)

ਦਿੱਲੀ ਵਿੱਚ ਹੋਏ ਧਮਾਕਿਆਂ ਦੀ ਜਾਂਚ ਦੌਰਾਨ ਇਕ ਮਹੱਤਵਪੂਰਣ ਸੁਰਾਗ ਹਾਸਲ ਹੋਇਆ ਹੈ। ਫ਼ਰੀਦਾਬਾਦ ਪੁਲਿਸ ਨੇ ਖੰਡਾਵਲੀ ਪਿੰਡ ਨੇੜੇ ਤੋਂ ਲਾਲ ਰੰਗ ਦੀ ਈਕੋਸਪੋਰਟ ਕਾਰ (ਨੰਬਰ DL 10 CK 0458) ਬਰਾਮਦ ਕੀਤੀ ਹੈ। ਇਹ ਕਾਰ ਮੁੱਖ ਸ਼ੱਕੀ ਡਾਕਟਰ ਉਮਰ ਉਨ ਨਬੀ ਨਾਲ ਸੰਬੰਧਿਤ ਹੋਣ ਦਾ ਸ਼ੱਕ ਜ਼ਾਹਰ ਕੀਤਾ ਜਾ ਰਿਹਾ ਹੈ।

ਜਾਂਚ ਅਧਿਕਾਰੀਆਂ ਅਨੁਸਾਰ, ਪ੍ਰਾਰੰਭਿਕ ਤੱਥਾਂ ਤੋਂ ਇਸ਼ਾਰਾ ਮਿਲਦਾ ਹੈ ਕਿ ਧਮਾਕਿਆਂ ਵਿਚ ਇੱਕ ਨਹੀਂ, ਸਗੋਂ ਦੋ ਵਾਹਨਾਂ ਦੀ ਵਰਤੋਂ ਕੀਤੀ ਗਈ ਹੋ ਸਕਦੀ ਹੈ। ਪੁਲਿਸ ਦੀ ਵਿਸ਼ੇਸ਼ ਟੀਮ ਮੌਕੇ ’ਤੇ ਪਹੁੰਚੀ ਤੇ ਕਾਰ ਦੀ ਮਾਲਕੀ ਤੇ ਦਸਤਾਵੇਜ਼ਾਂ ਦੀ ਪੁਸ਼ਟੀ ਕੀਤੀ।

ਕਾਰ ਨੂੰ ਹੁਣ ਫ਼ੋਰੈਂਸਿਕ ਵਿਸ਼ਲੇਸ਼ਣ ਲਈ ਭੇਜ ਦਿੱਤਾ ਗਿਆ ਹੈ, ਤਾਂ ਜੋ ਇਸ ਵਿੱਚੋਂ ਕੋਈ ਸਬੂਤ ਮਿਲ ਸਕਣ। ਇਸ ਖੋਜ ਨਾਲ ਜਾਂਚ ਏਜੰਸੀਆਂ ਦੀ ਤਫ਼ਤੀਸ਼ ਨੂੰ ਨਵਾਂ ਮੋੜ ਮਿਲਿਆ ਹੈ, ਜਦਕਿ ਪੁਲਿਸ ਵੱਲੋਂ ਸ਼ੱਕੀ ਡਾਕਟਰ ਦੇ ਸੰਪਰਕ ਵਿੱਚ ਰਹੇ ਹੋਰ ਵਿਅਕਤੀਆਂ ਦੀ ਭਾਲ ਤੇ ਵੀ ਧਿਆਨ ਦਿੱਤਾ ਜਾ ਰਿਹਾ ਹੈ।